Me 73 vota për, asnjë kundër dhe asnjë abstenim, është miratuar propozim-rezoluta për hapjen e tërësishme të kontrollit për hyrje/daljet e shtetasve të Kosovës dhe Shqipërisë nëpërmjet pikave të kalimit kufitar në Vërmicë, Qafë Prush dhe Qafë Morinë. Thënë ndryshe, heqjen e traut për dy anët e kufirit.
Por ky lajm ka marrë një vëmendje të gjerë mediatike edhe në shtypin serb, ku shkruhet se ” Kosova hap kufirin me Shqipërinë”, duke alarmuar Serbinë.
Deputetët kanë pasur druajtje nëse po shkaktojnë probleme para ardhjes së rekomandimit për liberalizimin e vizave për qytetarët e Kosovës dhe kanë shprehur rezervat për jetësimin e rezolutës duke thënë se edhe pala shqiptare duhet ta thotë fjalën e saj.
Deputetët nga LDK-ja, Armend Zemaj dhe Arben Gashi, thanë se duhet të ketë kujdes se si të trajtohet kjo çështje pasi bëhet fjalë kufinj.
“Duhet të pritet deri sa të vijnë rekomandimet nga BE-ja për procesin e liberalizimit të vizave”, deklaruan ata.
Por propozuesi i rezolutës, deputeti i Partisë Socialdemokrate Dardan Molliqaj, tha se nuk janë duke i hequr kufijtë, por heqjen e kontrollit për qytetarët e dyja vendeve.
Molliqaj tha se hapja e tërësishme të kontrollit për hyrje daljet të shtetasve të dyja vendeve nuk paraqet problem as për procesin e liberalizimit të vizave dhe as për hapjen e negociatave të Shqipërisë.
Deputeti i VV-së, Rexhep Selim, u shpreh se ky kufi nuk do duhej fare të ekzistonte, e aq më tepër siç ka ekzistuar deri më tash me pengesa shumë të mëdha. Por, pati edhe rezerva për implementimin e kësaj rezolute.
Muharrem Nitaj në emër të AAK-së, ka thënë se për jetësimin e kësaj rezolute duhet edhe miratimi i palës shqiptare.
“Ka një paqartësi në fillim të kësaj rezolute pra fjala është për hapjen e tërësishme të kontrolleve në kufi. Tema është bukur shumë sensitive. Për fatin e keq në këtë rezolutë janë paragjykimet se kjo nuk di të shkoj tutje sepse qeveria nuk ka vullnet ta shtyjë këtë rezolutë. Unë besoj që qeveria ka vullnet për lehtësimin e qarkullimit. Unë besoj se së pari qeveria të merret vesh së pari me qeverinë e Shqipërisë dhe nëse nuk do të ketë koordinim paraprak besoj që kjo nuk do të bëhet pasiqë për jetësimin e kësaj duhet dakordimi i të dyja palëve”, tha ai, shkruan “tesheshi.com”.
Edhe deputetja e LDK-së, Hykemte Bajrami tha se miratimi i rezolutës nuk do të thotë se ajo mund të zbatohet,
“Kjo mbetet iniciativë e njëanshme nëse nuk ka vullnet politik”, tha ajo.
Kurse deputeti i Nismës Socialdemokrate të Kosovës, Milaim Zeka e quajti krejt debatin për hapjen e kufirit me Shqipërinë diskutim koti.
Kujtojmë se deputetët në seancën e së mërkurës votuan edhe pro rezolutës për heqjen e tarifave të roaming-ut me Shqipërinë.
