10-vjetori i Pavarësisë ka mbledhur sot figurat më të rëndësishme të politikës shqiptare, duke zhdukur për një moment ndasitë mes tyre.
Kështu, presidenti Meta, kryeministri Rama, kryedemokrati Basha, kryetarja e LSI-së, Kryemadhi, ish-lideri i PD-së Berisha dhe kreu i Kuvendit Gramoz Ruçi kanë marrë pjesë sot në seancën solemne për nder të 10-vjetorit të Pavarësisë së Kosovës.
Kryeministri Rama ka mbajtur një fjalë përshëndetëse, ku ka propozuar një President gjithëkombëtar dhe një politikë kombëtare të sigurisë.
“Kosova dhe Shqipëria do të kenë një politikë të jashtme e jo veç ambasada dhe përfaqësi diplomatike të njëjta, po pse jo një president simbol të unitetit kombëtar dhe një politikë kombëtare të sigurisë”, ka thënë Rama ndër të tjera.
“Mbase ky parafytyrim sot mund të mos jetë i qëllueshëm në rrafshin e racionales, por historia na këshillon se çka është e drejtë të ëndërrohet nuk është e pamundur të realizohet”, ka shtuar ai.
Ai ka këshilluar Kosovën dhe Serbinë të vazhdojnë dialogun për fqinjësi të mirë dhe të bëhen pjesë e BE-së si dy shtete të pavarura:
“Sistemi doganor do të jetë i unifikuar. Turizmi do të jetë kthyer në një industri të fuqishme të zhvillimi, falë edhe infrastrukturës moderne. Dialogu me Serbinë do të jetë histori, popujt do të bashkëpunojnë si dy fqinjë të mirë. Historia na këshillon se çka është e drejtë të ëndërrohet, nuk është e pamundur të realizohet. E shkuara e 20 viteve të fundit, i ka paraprirë njerëzve një të ardhme që është më e afërt se largësia që shohim sot.”
