Ministria e Kulturës nuk e ka bërë studimin e fizibilitetit për ndërtimin apo rikonstruksionin e Teatrit Kombëtar.
Siç duket në shkresën dërguar Kuvendit, thuhet se në vitet 2014-2015 janë ndërmarrë disa inspektime nga specialistët e Institutit të Monumenteve me kërkesë të Drejtorit të Teatrit Kombëtar.
Më poshtë, shkresa vijon se nga inspektimi i datës 12.03.2014, rezulton se gjendja e përgjithshme e objektit të teatrit paraqitet e amortizuar, por duket se pavarësisht ‘ultimatumit’ për ndërhyrjen e menjëhershme, askush nuk ka marrë mundimin për të ndërhyrë, edhe pas shumë vitesh.
Denoncimi vjen nga ish-drejtori i Teatrit Eksperimental, regjisori Kastriot Çipi, i cili shkruan në Facebook:
Tashmë është zyrtare: Ministria e Kulturës nuk e ka bërë studimin e fizibilitetit për Teatrin Kombëtar! Prej pesë vjetësh znj. Kumbaro po shpreson që TK të shembet aksidentalisht. Nëse vdesin njerëz nën rrënoja, asaj nuk i intereson aspak. Mjaft t’i dalë profecia.
