Gjermania është e përmbajtur në aspektin e iniciativave për shkëmbimin e territorit Serbisë dhe Kosovës. Por, nëse kjo do të ishte e vetmja zgjidhje atëherë ia vlen të diskutohet. Kështu është shprehur kryetari i Komisionit për Çështje Evropiane të Parlamentit gjerman, Gunther Krichbaum.
Zyrtari gjerman, një aleat i ngushtë i kancelares Angela Merkel, i bëri këto deklarat pas takimit që pati me Presidentin e Serbisë, Aleksandar Vuçiç në Beograd.
Ai ka folur me Vuçiç për idenë e shkëmbit të territoreve, ku është shprehur se Gjermania, ndryshe nga Franca, SHBA-të, por edhe Komisioni Evropian, hezitonin për këtë çështje.
“Unë nuk mund të flas në emër të qeverisë gjermane, por personalisht mund të them se ekziston frika se një zgjidhje e tillë mund të ndikojë negativisht në rajone të tjera”, ka thënë Krichbaum.
Sipas tij, “një masë e tillë nuk është diçka që mund të zgjidhë tërë problemin”, raporton balkaneu.com.
Gjermania kundër
Krichbaum theksoi se nëse kjo masë mund të jetë një zgjidhje, atëherë duhet të diskutohet, por kjo konsiderohet të jetë më shumë brenda kompetencave të KE.
Ai shpjegoi se droja e Gjermanisë vjen nga fakti se në qoftë këmbehen disa fshatra, banorët e tjerë, për shembull, mund të kishin përshtypjen se po jetojnë në vendin e gabuar.
Ai vuri në dukje pasojat e mundshme për vendet e tjera në rajon, duke përmendur shembullin e Maqedonisë, në të cilin, ai kujtoi se një pjesë e konsiderueshme e popullsisë janë shqiptarë.
Ndër të tjera, njeriu i Merkelit shfaqi dhe padakortësinë e tij lidhur me vendimin e qeverisë së Kosovës për tarifimin me 10 përqind të produkteve serbe. Sipas Krichbaum, masa të tilla nuk janë kurrë të mira.
“Nuk mund të besoj se tarifat janë histori suksesi. Baza e lirisë në BE janë lëvizja e mallrave, njerëzve dhe shërbimeve. Vetëm në këtë mënyrë është e mundur zhvillimi i ekonomisë. Tarifimi bën që mallrat të jenë më të shtrenjta, gjë që ul kërkesën”, tha Krichbaum./TIRANA TODAY/
