Komisioni Evropian, ditën e sotme ka bërë me dije se ka arritur një marrëveshje me Pfizer dhe BioNTech, për furnizimin me 4 milion doza shtesë të vaksinës Covid që do të dorëzohen këtë muaj, në të gjithë Evropën.
Dozat për të vaksinuar 2 milionë njerëz do të dërgohen tek vendet që janë më të prekura me sëmundjen vdekjeprurëse, shkruan agjencia e lajmeve, Reuters.
Ursula von der Leyen, presidentja e KE u shpreh se për të trajtuar variantet agresive të virusit dhe për të përmirësuar situatën në pikat e nxehta, veprimi i shpejtë dhe vendimtar është i nevojshëm.
Njoftimi vjen në kohën kur Komisioni Evropian po përpiqet t’i bindë së paku gjashtë shtete anëtare – përfshirë Gjermaninë e Austrinë – që t’i heqin kufizimet në kufij, të vendosura për shkak të numrit të lartë të rasteve me koronavirus në vendet fqinje.
BE-ja ka gjashtë kontrata për më shumë se 2 miliardë doza vaksinash, për të imunizuar 450 milionë njerëzit e saj.
