Mbretëria e Bashkuar ka shënuar një tjetër bilanc tragjik nga koronavirusi në 24 orët e fundit.
Sipas mediave vendase, 917 persona kanë humbur jetën ditën e sotme, 63 viktima më pak se një ditë më parë. Kështu numri total i viktimave shkon në 9,875.
Edhe pse sot u shënua një rënie e lehtë, prapë numri i viktimave është shumë më i lartë se mesatarja e përllogaritur.
Në mesin e 917 viktimave është shënuar edhe rasti më i ri i vdekjes nga koronavirusi në Mbretërinë e Bashkuar. Raportohet se një 11-vjeçar nga Anglia ka humbur jetën nga COVID-19 në orët e fundit.
Prej dy ditësh tashmë numri i testimeve në Mbretërinë e Bashkuar është dyfishuar pothuajse, teksa vetëm në 24 orët e fundit janë zhvilluar rreth 18 mijë të tilla.
Deri javën e kaluar ishin Spanja dhe Italia ato që shënonin ritmin më negative të viktimave nga koronavirusi. Por prej disa ditësh tashmë kurba në këto vende është ulur ndjeshëm.
Numrin më të madh të vdekjeve në Evropë këto ditë po i shënon Franca dhe Mbretëria e Bashkuar. Franca renditet e katërta në botë me numrin më të madh të vdekjeve nga ky virus, ndërsa Mbretëria e Bashkuar e pesta.
Mbi 1,7 milionë njerëz nga e gjithë bota janë prekur nga COVID-19, ndërsa mbi 103 mijë persona kanë humbur jetën.
