Presidentja e KE-së, Ursula von der Leyen ka njoftuar se BE do të zhvillojë një konferencë për të mbledhur fonde, për të mbështetur kërkimet për vaksinën ndaj koronavirusit.
Mësohet se konferenca në fjalë do të mbahet më 4 maj.
“Që të mundim koronavirusin duhet një iniciativë globale për të mbledhur fonde. Për ta realizuar, vendosa që të mbaj një konferencë donatorësh online më 4 maj.
Në këtë mënyrë do të gjejmë të ardhurat e nevojshme për të gjetur më pas zgjidhje inovative dhe të drejta. Bashkë më të fortë”, tha ajo.
COVID-19 ka goditur rëndë ekonomitë e shumë vendeve në Evropë, si dhe ka shkaktuar një numër të madh viktimash në Itali, Spanjë, Francë etj.
Komisioni Evropian ka paraqitur 3 parakushtet që vendet të rinisin aktivitetet normale.
Sipas këtyre kushteve, heqja e kufizimeve mund të bëhet:
- Kur numri i të prekurve zvogëlohet ndjeshëm bazuar në kritere të forta epidemiologjike.
- Kur sistemet shëndetësore të kenë kapacitete të mjaftueshme.
- Kur të bëhet testimi në shkallë të gjerë
Evropa vijon të jetë epiqendra e koronavirusit, teksa shtatë nga 10 vendet më të prekura nga COVID-19 ndodhen në këtë kontinent.
