Arjen Robben ka njoftuar se gruaja e tij ka rezultuar pozitive me Covid-19, por tani e ka mposhtur virusin. Ish-ylli i Bayern Munchen, konfirmoi lajmin e keq, duke thënë se Bernadien ka shfaqur simptoma të problemeve me frymëmarrjen.
36-vjeçari, i cili i është bashkuar ish-shokëve të skuadrës gjatë ditëve të pandemisë, duke u stërvitur virtualisht me ta së bashku me Bastian Schweinsteiger, tha se familja është futur në karantinë në shtëpi. Fatmirësisht ai dhe fëmijët rezultuan negativ pas testit dhe tani po qëndrojnë të izoluar.
“Është absolutisht një ndjesi jo e bukur. Por jam shumë i lumtur që gjendja nuk është e keqe. Fatmirësisht, në testin e dytë ajo ka dalë negative”, tha Robben, duke e kaluar pa pasoja të rënda infektimin me koronavirus në shtëpinë e tij.
Robben kishte planifikuar një maratonë përpara shpërthimit të epidemisë. Ai luajti për 10 vite me Bayern Munchen derisa vendosi të varte këpucët në gozhdë verën e shkuar.
Ai njoftoi se do të rikthehet në Holandë këtë verë. “Shtëpia mbetet shtëpi dhe kemi vendosur që të rikthehemi në Holandë”, u shpreh mëngjarashi që fitoi gjithçka me fanellën e rekordmenëve të Gjermanisë.
