Presidenti i Maqedonisë së Veriut, Stevo Pendarovski, ka zgjatur gjendjen e jashtëzakonshme në vend edhe për 14 ditë.
Vendimi u mor gjatë seancës së shtatë të Këshillit të Sigurisë, për të diskutuar rrjedhën e gjendjes së jashtëzakonshme, për shkak të situatës së koronavirusit.
Pas takimit, Pendarovski doli në një konferencë për shtyp ku sqaroi se arsyen e zgjatjes së gjendjes së jashtëzakonshme. Ai tha se numri i rasteve me COVID-19 dhe numri i vdekjeve po rritet, duke shtuar se ekziston shqetësim serioz për disa komuna.
Sipas tij, vendimi për 14 ditët e reja ka të bëjë me atë që qeverisë t’i mundësohet t’i menaxhojë në mënyrë më efektive efektet e pandemisë në shëndetësi.
Pendarovski theksoi se kjo nuk ka asnjë lidhje me datën e zgjedhjeve parlamentare.
Kujtojmë se Presidenti i Maqedonisë së Veriut, Stevo Pendarovski, shpalli gjendje të jashtëzakonshme më 18 mars të këtij viti, me kërkesë të qeverisë, me qëllim të luftës kundër përhapjes së koronavirusit.
Një muaj më vonë, Pendarovski shpalli një gjendje të re 30-ditore të jashtëzakonshme. Më 15 maj, gjendja e jashtëzakonshme u vazhdua edhe për 14 ditë të tjera.
