Lidhur me situatën e rëndë krijuar nga koronavirusi, Presidenti i Kosovës, Hashim Thaçi, ka njoftuar se ka nënshkruar dekretin për gjendje të jashtëzakonshme.
“Bazuar në detyrat e mia kushtetuese si President, pas takimit të sotëm me Këshillin e Sigurimit të Kosovës, kam nënshkruar një dekret për të shpallur gjendjen e jashtëzakonshme në mes të situatës së krijuar nga shpërthimi i # COVID19”, ka shkruar Thaçi në “Twitter”.
Propozimin për gjendje të jashtëzakonshme Thaçi e dha të martën mbrëma, gjatë një konference shtypi, pas takimit të Këshillit të Sigurisë Kombëtare.
Qeveria, gjatë një konference pas asaj të Thaçit, e quajti këtë si masë ekstreme dhe të panevojshme. Për të hyrë në fuqi, dekreti duhet të votohet nga dy të tretat e deputetëve të Kuvendit të Kosovës.
Dje, Ministri i Shëndetësisë, Arben Vitia, në një konferencë për media, ka bërë të ditur se numri i të prekurve me koronavirus tashmë ka shkuar në 17.
Ai tha se pacientët janë në gjendje të mirë shëndetësore, teksa bëri të ditur se dy prej tyre kanë dalë nga Klinika e Infektivit.
“Deri më sot në Kosovë janë testuar 271 mostra, të dyshimta, 17 prej tyre kanë rezultuar pozitive. Gjendja e të prekurve në klinikë është stabile, përjashtim pacientit të moshuar qe po trajtohet me oksigjen herë pas here”, tha ai.
