Presidenti Donald Trump, i është përgjigjur lansimit të një rakete nga ana e Phenianit. Ai ka thënë se “të gjitha opsionet janë në tryezë”.
“Koreja Veriore ka “sinjalizuar mospërfillje për fqinjët e vet, për të gjithë anëtarët e Kombeve të Bashkuara dhe për standardet minimale të sjelljes ndërkombëtarisht të pranuar”, tha Trump në deklaratën e sotme.
Raketa e lansuar verikoreane ka fluturuar mbi ishullin Hokaido, para se të përplasej në det. Tokio e cilësoi të “paprecedent” kërcënimin për Japoninë.
Kryeministri i Japonisë, Shinzo Abe, tha se ka biseduar me presidentin Trump dhe janë pajtuar për rritje të presionit ndaj Koresë Veriore.
Ambasadori i Koresë Veriore në Kombet e Bashkuara tha se aksionet e Phenianit janë përgjigje ndaj ushtrimeve ushtarake që zhvillohen ndërmjet Shteteve të Bashkuara dhe aleatëve të vet në rajon.
Kina theksoi se tensionet në Gadishullin Korean kanë arritur “pikën më të lartë”, dhe se Uashingtoni dhe Seuli, duhet të fajësohen pjesërisht për ushtrimet ushtarake të përsëritura, me të cilat bëhet presion kundër koreanoveriorëve.
Sergei Lavrov, ministri i Jashtëm rus tha se Koreja Veriore “duhet t’i respektoj” rezolutat e Kombeve të Bashkuara, njofton Rel.
Këshilli i Sigurimit i OKB-së do të mbajë gjatë ditës së sotme një seancë të jashtëzakonshme.
