Fakulteti i Shkencave të Natyrës i Universitetit të Tiranës ka vendosur të apelojë vendimin e qeverisë për të kaluar Kopshtin Botanik në pronësi të Bashkisë së Tiranës.
Vendimi u mor në mënyrë unanime nga asambleja e FSHN-së, gjatë mbledhjes së jashtëzakonshme që u mbajt ditën e djeshme.
Nëpërmjet një deklarate për shtyp, FSHN tha se Gjykata Administrative duhet të vendosë në favor të shpëtimit të këtij institucioni unik me vlera kombëtare të pazëvendësueshme.
“Të shqetësuar për fatin e Kopshtit Botanik dhe në pritje të përfundimit të procesit gjyqësor, Asambleja unanimisht mori vendim që të përcjellë nga afër të gjitha hapat e këtij procesi, me praninë e të gjithë trupës së saj para Gjykatës Administrative të Apelit, ditën e mërkurë, datë 09.10.2019 ora 11:00, me shpresë të një vendimi të drejtë në favor të shpëtimit të këtij institucioni unik me vlera kombëtare të pazëvendësueshme”, thuhet në deklaratën e FSHN-së.
Këshilli i Ministrave vendosi në mbledhjen e 17 korrikut 2019 të kalojë Kopshtin Botanik në pronës të Bashkisë së Tiranës, pronë e cila më parë ishte e Universitetit të Tiranës.
