Edhe pse presidenti Safet Gjici investoi shumë në përgatitjet e Kukësit, duke nisur që nga faza përgatitore në Austri e deri te transfertat cilësore dhe të shtrenjta për buxhetin e klubit verilindor, përsëri Kukësi u eliminua nga turi i dytë i Champions League.
Si rrjedhim pjesë e klubit u bënë lojtarë si Naser (80 mijë euro në sezon) sikurse u larguan lojtarë Serran (60 mijë euro më sezon). Më e vështira fillon te ruajtja e boshtit të skuadrës që fitoi kampionatin. Me eliminimin Kukësi filluan edhe problemet, pasi plot shtatë lojtarëve shumë të rëndësishëm të Kukësit u kanë skaduar kontratat dhe janë të lirë, gjithashtu dhe trajnerit Ernest Gjoka.
Mësohet se Enea Koliçi është një prej shtatë lojtarëve që u ka skaduar kontrata me Kukësin dhe aktualisht është i lirë. Duke qenë se ka bërë një sezon mjaft të mirë me Kukësin ka pasur disa kërkesa për të nga klube të ndryshme brenda dhe jashtë vendit, ndër të cilat Okser në Francë, për të cilën pogradecari e ka pohuar vetë që ka ofertë konkrete dhe ka dëshirë të shkojë.
Megjithatë flitet për një prapaskenë të Koliçit. 31-vjeçari do qëndrojë në kampionatin shqiptar, dhe me shumë mundësi do transferohet te Skënderbeu. Mësohet se Koliçi ka nënshkruar një para kontratë me korçarët dhe shumë shpejt kalimi i tij do bëhet zyrtar. Por, thuhet se lojtari është interesuar në FSHF dhe aty ka mësuar se kontrata e tij është rinovuar automatikisht edhe për një vit. Koliçi duhet të kishte lajmëruar më parë klubin nëse kërkonte të largohej. Palët mund të përfundojnë në gjyq për të zgjidhur këtë çështje. Pritet të shihet se si do të menaxhohet e gjithë kjo situate nga klubi.
