Një 17-vjeçar nga Amerika është në gjendje të rëndë shëndetësore, si pasojë e bllokimit të mushkërive, që besohet të ketë ardhur nga konsumimi i cigareve elektronike.
Sipas mediave të huaja, Tryston Zohfeld, nga Teksasi, shkoi në spital me urgjencë më 26 korrik, pasi mushkëritë që i kishte pasur të shëndetshme i ndaluan së funksionuari.
Gjendja e tij sa vinte dhe përkeqësohej ndërsa mjekët u detyruan ta lidhnin me një ventilator që e mbante gjallë.
Pas 10 ditëve i shtruar në spital, 17-vjeçarit in iu bë një ekzaminim me rreze X dhe rezultoi se mushkëritë i kishte tërësisht të bllokuara.
Ndërkohë, mjekët i bënë çdo analizë të mundshme por mbetën pa asnjë përgjigje. Ishte një nga familjarët e pacientit që u tregoi mjekëve se ai tymoste rregullisht cigare elektronike, që i çoi doktorët të kuptonin se cili ishte shkaku i bllokimit të mushkërive.
Një sëmundje ‘misterioze’ e lidhur me cigaret elektronike po hetohet së fundmi në SHBA, pasi qindra persona rezultojnë të sëmurë rëndë. Sipas të dhënave, deri më tani janë investiguar rreth 153 raste të sëmundjeve të rënda të mushkërive, si pasojë e përdorimit të cigareve elektronike.
