Siguria ushqimore mbetet një ndër temat më të diskutuara në Shqipëri. Konsumatorët janë përballur me raste abuzive, por pavarësisht reagimit të tyre, organet kompetente nuk kanë reaguar në kohë ndaj subjekteve që kanë tregtuar ushqime që rrezikojnë shëndetin e konsumatorëve.
E ndodhur përballë presionit të konsumatorit, qeveria ka përgatitur një draft ligjor për etiketimin e ushqimeve dhe informimin e konsumatorëve. Në projektin që është ende në fazë përpunimi parashikohet gjithë informacioni që duhet t’i jepet konsumatorit për një ushqim të prodhuar në vend, importuar, të para paketuar apo në çdo kusht tregtimi.
Po kështu drafti përcakton se subjektet nuk do të lejohen të deformojnë apo çojnë mesazhe të gabuara përmes reklamave duke i mëshuar një vetie ose specifike si e veçantë kur këtë të fundit mund ta kenë të gjithë produktet. Ministria e Bujqësisë dhe Zhvillimit Rural e cila është edhe përgjegjëse për këtë fushë ka përcaktuar standardet mbi atë që quhet informacion i drejtë dhe informacion i detyrueshëm.
Informimi i drejtë
Draft ligji parashikon se konsumatori nuk duhet të orientohet në mënyrë të gabuar në përmes praktikave të veçanta si në lidhje me karakteristikat e produktit ushqimor dhe kjo përkufizohet në katër ndarje. Së pari lidhur me natyrën e produktit, identitetin, vetitë, përbërjen, sasinë, jetëgjatësinë, shtetin e origjinës apo vendin e prejardhjes.
Së dyti duke i dhënë produktit ushqimor efekte ose veti të cilat ai nuk i ka apo duke theksuar që produkti ushqimor ka karakteristika të veçanta, kur në fakt të gjitha produktet ushqimore të ngjashme kanë karakteristika të tilla. Së fundmi duke theksuar, përmes paraqitjes së produkteve ushqimore, përshkrimit ose imazheve, praninë e një ushqimi apo përbërësi të veçantë, ndërkohë që në të vërtetë, një komponent natyrshëm i pranishëm.
Në rastet kur ushqimi kërkon të nxjerrë në pah një karakteristikë apo veti të tij të veçantë duhet ta provojë atë sipas rastit qoftë dhe shkencërisht.
Informacioni i detyrueshëm
Ministria ka përcaktuar në projektligj edhe informacionin detyrues që duhet të jepet për çdo produkt. Janë në total 11 pika që nisin nga emri i produktit e deri tek deklarata e vlerave ushqyese:
a) emri i produktit ushqimor;
b) lista e përbërësve;
c) çdo përbërës ose lëndë ndihmëse e përpunimit e renditur në shtojcën II ose që vjen nga
një substancë ose produkt i renditur në shtojcën II, që shkakton alergji ose intoleranca, i përdorur në
prodhimin ose përpunimin e produktit ushqimor dhe që është ende i pranishëm në produktin
përfundimtar, edhe nëse në formë të ndryshuar;
d) sasia e përbërësve të caktuar ose e kategorive të caktuara të përbërësve;
e) sasia neto e produktit ushqimor;
f) data e jetëgjatësisë minimale ose “të përdoret përpara” datës;
g) kushtet e veçanta të ruajtjes dhe/ose kushtet e përdorimit;
h) emri ose emri tregtar dhe adresa e operatorit të biznesit ushqimor të përmendur në nenin
8, pika 1;
i) shteti i origjinës ose vendi i prejardhjes kur parashikohet në nenin 26;
j) udhëzimet e përdorimit, kur në mungesë të tyre, përdorimi i duhur i produktit ushqimor do
të ishte i vështirë;
k) për pijet me mbi 1,2% të vëllimit me alkool, fortësinë aktuale alkoolike për vëllim;
l) deklarata e vlerave ushqyese
Në çdo raste kur produktet janë të importuara ato duhet të kenë të shkruar në shqip pjesën e informacionit detyrues, ose të shoqërohen me kundra etikete.
