Pak orë para koncertit madhështor, Rita Ora është përlotur gjatë një konference për mediat, ndërsa dha komentin e saj për përdhunimin e 11-vjeçares në Kosovë.
Mes lotësh, Rita Ora tha se këto ngjarje nuk duhet të përsëriten më.
“Ju kërkoj ndjesë, sepse mund të jem emocionale. Ajo çfarë ndodhi në Kosovë, na bëri të kujtojmë edhe një herë se sa e rëndësishme është për prindërit që të punojnë me fëmijët që këto ngjarje mos përsëriten më”.
Ylli shqiptar me famë ndërkombëtare, do të këndojë sot në sheshin “Skënderbej”.
Koncerti do të jetë falas për të gjithë ata qytetarë që duan të shohin nga afër këngëtaren. Krah Rita Orës do të performojnë edhe këngëtarë të tjerë shqiptarë si Ronela Hajati dhe Kida.
Rita Ora është një nga këngëtaret më të suksesshme botërore. Karriera e saj si dhe këngët e shumta e kanë kthyer Ritën në një yll botëror. Dje Presidenti Bajram Begaj e dekoroi artisten me Titullin “Naim Frashëri” për mirënjohje për aktivitetin dhe rolin e saj si ambasadore në çështje me ndjeshmëri të lartë kombëtare dhe globale.
