Një ngjarje makabre ka ndodhur në fshatin Kozare të Kuçovës gjatë mbrëmjes së djeshme, ku një 64-vjeçare është vrarë nga fqinji i saj, për shkak të borxheve. Familjarët u alarmuan pasi 64-vjeçarja Fatime Suli nuk ishte kthyer në banesë si zakonisht. Kjo ka bërë që efektivët të vihen në kërkim, ku e kanë gjetur të hedhur në një kanal, të zhveshur nga mesi e poshtë dhe e mbuluar me gjethe në lagjen “Havaleas”, vetëm 1 km larg banesës së saj.
Kamerat e sigurisë zbulojnë autorin
Nga kamerat e sigurisë u bë e mundur zbulimi i autorit të ngjarjes, Fetah Narra, 58-vjeç, i cili ishte komshi me 64-vjeçaren. Dyshimet e para janë që gruaja të jetë mbytur me duar, për shkak të disa parave borxh që 58-vjeçari i kishte Sulit.
Autori Fetah Narra aktualisht ndodhet në polici, ku po jep dëshminë e tij, për të zbuluar më shumë detaje mbi ngjarjen e rëndë.
Viktima ishte zhveshur
Fatime Suli, 64 vjeçe është gjendur e vdekur, e hedhur në një kanal pranë një plantacioni me sera, e zhveshur nga mesi e poshtë dhe e mbuluar me gjethe. Autor i ngjarjes së rëndë është komshiu i saj, i cili e ka mbytur, për shkak të borxheve që i kishte viktimës.
Ja se çfarë njofton policia
Mbyti 64-vjeçaren dhe e hodhi në kanal, Policia zbardh ngjarjen dhe identifikon autorin e dyshuar. Vihet në pranga 58-vjeçari.
Shërbimet e Komisariatit të Policisë Kuçovë, pas marrjes së njoftimit për një shtetase të pajetë në kanal, në fshatin Havaleas, Kuçovë, menjëherë kanë shkuar në vendngjarje, së bashku me grupin hetimor.
Falë veprimeve të shpejta dhe informacioneve të grumbulluara, u bë i mundur identifikimi dhe kapja e autorit të dyshuar të kësaj ngjarje.
Në vijim të veprimeve, nga specialistët e Seksionit për Hetimin e Krimit në Komisariatin e Policisë Kuçovë u bë arrestimi në flagrancë i shtetasit Fetah Marra, 58 vjeç, banues në fshatin Havaleas, Kuçovë, i cili dyshohet se për motive të dobëta, e ka mbytur dhe e ka lënë në një kanal shtetasen Fatime Suli, 64 vjeçe, banuese në fshatin Havaleas, Kuçovë.
Grupi hetimor, nën drejtimin e Prokurorisë së Rrethit Gjyqësor Berat, vazhdon hetimet për zbardhjen e plotë të rrethanave të ngjarjes.
