Ndeshja mes Luftëtarit dhe letonezëve të Ventspilsit u kthye në një “show”, e cila ka ngritur shumë hije dyshimi nëse kanë ndikuar faktorë të jashtëm në rezultat apo jo. Dyshimet e para erdhën si pasojë e luhatjes së koeficienteve para dhe gjatë ndeshjes, e bënte habi në syrin e çdo njeriu që e njeh këtë sport. Një ndër drejtuesit e kompanisë ndërkombëtare të basteve “Betsafe”, Valter Rozmanis ka folur për këtë ndeshje.
Sipas tij luhatjet e koeficienteve nuk ishte normale, por edhe mënyra si erdhi goli i tretë lë shumë hije dyshimi. Nuk ndodh ndonjëherë që në minutën e 88’ një skuadër që është duke fituar të ketë një koeficient 2, maksimumi arrin 1.2, shkruan Vipsport. Ai shprehet se ato luhatje ndodhin shpesh herë kur ndeshjet janë të paracaktuara por ka raste që luhatjet janë të kota. Këtë të dytën, Rozmanis e hedh poshtë për këtë takim.
“Gjatë pjesës së dytë, ne e hoqëm mundësinë që të luhet ajo ndeshje në baste. Duke qenë se nuk i kam kontrolluar të gjitha, nuk mund të dal në një përfundim të saktë, sidoqoftë, në disa kompani, koeficientet ishin shumë të çuditshëm, që është një nga shenjat dalluese të një ndeshjeje të dyshimtë.
Shembull është “Bet365” që fitoren e Luftëtarit në minutën e 88, e kishte kuotuar me 2.0, megjithëse skuadra po fitonte me rezultatin 3-2 në atë moment. Normalisht, ky koeficient nuk duhet të jetë më i lartë se 1.2. Duke parë se si shënoi Ventspilsi golin e tretë mund të thuhet se kanë ndikuar faktorët e jashtëm, pasi ishin shënuar edhe 5 gola më parë, por sërish kjo gjë nuk duhet ta rrisë aq shumë koeficientin.
Ky është vetëm mendimi im në vlerësimin e fakteve që kam në dispozicion. Raportet e tilla të paqëndrueshme zakonisht tregojnë një ndeshje të dyshimtë. Mund të quhen edhe gabime njerëzore lëvizjet e koeficienteve, por ama kjo gjë verifikohet nga bilanci financiar që ka pasur “Bet365″. Kompania jonë e ka mbajtur këtë ndeshje LIVE deri në fundin e pjesës së parë”, u shpreh Rozmanis.
