Zv.Ministrja e Shëndetësisë, Mira Rakacolli, zbuloi vendimin më të fundit që është marrë për universitetet. Në një konferencë për mediat, ajo tha se mësimi në universitete në vend do të vijojë online, për një kohë të pacaktuar.
Në konferencën e përjavshme për shtyp të Komitetit të Ekspertëve, Rakacolli bëri apel të fortë për respektimin e masave. Ajo konfirmoi se situata vijon të mbetet tërësisht e kontrolluar. Por për t’i paraprirë rëndimit të situatës, mësimi në universitete do të vijojë online.
“Situata vijon të mbetet tërësisht e kontrolluar. Për t’i paraprirë rëndimit të situatës, siç e kishim thënë mësimi në universitete për shkak të situatës do të vijojë online, dhe për një periudhë të vlerësimit dinamik të situatës.
Beteja me COVID është betejë territori, jo vetëm e sistemit spitalor. Të nderuar qytetar, vetëm nëse do të zbatoni të gjitha ato masa që ne i kemi thënë vazhdimisht, do ta ndalojmë epideminë dhe jemi akoma në kushte të llogaritura mirë dhe mundet ta ndalojmë.
Të mos grumbullohemi më shumë se 10 veta, të evitojmë pjesëmarrjen në ceremonitë familjare, të kufizojmë pjesëmarrjen në aktivitet kulturore e sportive dhe protokollet e sigurisë”, tha Rakacolli.
