Seanca e sotme parlamentare ka nisur me debate mes kreut të Kuvendit dhe opozitës.
Teksa diskutohej për ngritjen e komisionit të Reformës Zgjedhore, opozita ka kërkuar fjalën për të diskutuar në lidhje me të. Kjo gjë është kundërshtuar nga kreu i grupit parlamentar të PS-së, Taulant Balla i cili tha se një gjë të tillë nuk e parashikon rregullorja.
“Sa herë janë ngritur komisione për reformën zgjedhore këtu në këtë sallë s’ka pasur diskutim, prandaj t’i qëndrojmë vendimit të marrë në Konferencën e Kryetarëve atje ku morëm vendim vetëm për objekt. Unë nuk jam dakord që komisioni të jetë me 18 anëtarë. Nuk ka bërë vaki kurrë që PD të degjenerojë me 3 anëtarë nga 18. Ne s’mund të bëhemi instrument i PD, lexoni rregulloren, keni hapësira për të bërë debat”, tha Balla.
Ballës i është kundërpërgjigjur deputeti Edmond Spaho, i cili tha:
“Në 25 vjet i kemi ngrit me konsensus komisionet dhe ka pasur debat. Po të kujtoj rastin e dekriminalizimit”, e më pas kërkoi shtyrjen e seancës për në orën 16:00 pasdite.
Spahos i është përgjigjur Ministri i Shtetit për Diasporën, Pandeli Majko, i cili tha se një debat i tillë duhet të zhvillohet në komisionin e posaçëm për reformën zgjedhore.
Ndërkohë, i ashpër ka qenë edhe reagimi i kreut të PD-së me kryeparlamentarin Gramoz Ruçi, të cilit i ka kërkuar të mbledhë Konferencën e Kryetarëve që opozita të ketë të drejtën e debatit.
