Personalitete të politikës, kolegë e të afërm vlerësuan kontributin e gazetarit, analistit, pedagogut dhe shkrimtarit Agim Neza. Në 55 vjetorin e lindjes së Agim Nezës janë promovuar tri librat e tij të fundit duke përkujtuar gjithashtu kontributin e çmuar të tij në gazetari e botën akademike.
Në këtë përvjetor u promovuan tre librat e tij të fundit, “Diplomacia publike”, “Marrëdhënia publike strategjitë dhe taktikat” si dhe “Dashuri e trishtim në një vend komunist”.
Agim Neza njihet edhe si këshilltar i disa prej figurave kryesore të politikës e në këtë drejtim profesionalizmi i Nezës u vlerësua nga Presidenti i zgjedhur Ilir Meta si dhe ish-kryetarja e Kuvendit Jozefina Topalli, dhe akademiku Artan Fuga.
Artan Fuga: Në veprat e tij ne kemi shpirtin e Agimit, i cili i takon studentëve, kolegëve, atyre që e citojnë e atyre që i referohen.
Ilir Meta: Do ta kujtojmë gjithmonë si një njeri mjaft luajal, të përgjegjshëm, por edhe me një botë të madhe”, tha presidenti i zgjedhur Ilir Meta.
Jozefina Topalli: Agimi ishte luajal, çtensionues, se ndonjëherë politikanët kalojnë momente të forta presionesh dhe tensionesh. Ai ishte një njeri që hynte në zyrë gjithmonë me një buzëqeshje.
Të afërmit shprehën mirënjohje ndaj atyre që u qëndruan pranë pas largimit nga jeta të Agim Nezës.
Në fund të aktivitetit, u shfaq edhe një dokumentar mbi jetën e Agim Nezës. Ai u largua nga jeta në moshën 54 vjeçare pasi vuante nga një sëmundje e rëndë.
