Gjykata e Shkallës së Parë Durrës ka lënë në burg Barjon Gumenin, administratorin e kompanisë “Alba Exotic Fruit”, në kontejnerët e së cilës u kapën 11.6 kg kokainë në portin e Durrësit. Gumeni nuk ka pranuar akuzat, duke mohuar përfshirjen e tij në trafikun e drogës. Ai ka thënë se nuk ka patur dijeni për sasinë e kokainës, që u gjet në kontejner.
Barjon Gumeni është edhe aksioner në kompani, ku zotëron 10% të aksioneve, ndërsa 90% janë në zotërim të Eduart Dautit, i cili është shpallur në kërkim.
“Nuk kam lidhje fare me drogën. Kemi porositur vetëm ngarkesën me banane. Droga nuk ishte në kontejner por ishte improvizuar në një vend të posaçëm, në pjesën fundore të kontejnerit”, mësohet të ketë thënë Gumeni.
Në lidhje me sasinë e kapur të lëndës narkotike këtë të martë në Durrës, është arrestuar Barjon Gumeni, administrator i firmës dhe një punonjës tjetër me emrin Jurgen Osmani. Ndërkohë Gumeni rezulton të jetë vëllai i pronarit të kompanisë “Alba Exotic Fruit”, Eduart Dauti.
Sipas informacioneve, ngarkesa ishte nisur më 8 korrik nga porti i Pireut dhe ka mbërritur në Portin e Durrësit në 11 korrik. Ngarkesa me banane vinte nga Ekuadori.
