Policia në Spanjë dhe Portugali ka sekuestruar me qindra kilogramë kokainë. Kjo e fundit u gjet brenda frutave tropikale, konkretisht brenda ananasit.
Policia ka arrestuar 9 persona, të cilët dyshohet se e transportuan drogën nga Amerika Latine.
Hetimi lidhur me këtë çështje kishte nisur që në prill të 2017-ës, por vetëm pas kontrolleve në disa kontenierë të mbërritur në portet e vendit, u zbulua mënyra origjinale e transportit të kokainës.
Policia sekuestroi 745 kilogramë drogë, si dhe shkatërroi laboratorët ku më pas përpunohej droga, ndërsa hetuesit pranuan se ky grup kriminal kishte sjellë sasi të mëdha droge në Evropë dhe u desh kohë për të zbuluar mënyrën se si ata vepronin.
Gadishulli Iberik është një pikë kyçe hyrjeje e kokainës dhe drogave të tjerë në Evropë nga Amerika Latine, apo nga Afrika e Veriut dhe ajo Perëndimore.
