Arda Turan ka tronditur futbollin turk me sjelljet e tij të dhunshme , që çuan deri në përdorimin e armëve ndaj këngëtarit Berkay Sahin në një lokal nate. Pas njohjes me rastin e skandalit të futbollistit të Barcelonës, i cili ka ushtruar dhunë fizike dhe më pas është parë në ambientet e një spitali me një pistoletë në dorë,pritet që të merret masa ndëshkimore.
Klubi ku Turan aktivizohet momentalisht, Baksaksehir, ka marrë një vendim drastik duke e dënuar me shifrën 370.000 euro. 31 vjeçari i cili luan në Turqi në formë huazimi nga Barcelona, ka postuar në rrjetet e tij sociale një postim, ku tregon se ka qenë thjesht një “debat”, por detajet e incidentit janë ekzagjeruar nga media. Klubi ka thirrur në një mbledhje urgjente të gjithë bordin këtë të martë, për të diskutuar mbi çështjen dhe kanë marrë vendimin mbi dënimin e futbollistit.
Konkretisht kanë thënë: “Duke ja lënë çështjen në dorë drejtësisë, ne do të gjobisim Arda Turan me 2.5 milion lira turke dhe do të donim të informonim publikun se detyrimet profesionale të lojtarit do të vijojnë derisa gjykata të marrë vendimin e saj përfundimtar.”
Sipas Agjencisë Anadolu, po mendohet për një dënim me burgim 12 vite për Arda. Huazimi i tij nga Barcelona është deri në sezonin 2019-2020.
