Gianni de Biasi që pas eksperiencës së shkurtër në Spanjë me Deportivo Alaves, nuk ka drejtuar asnjë skuadër futbolli. Tekniku italian kërkon që të marrë drejtimin e një skuadre që në fillim të kampionatit, apo që të mos jetë në luftë për mbijetesë.
Ishte Crotone klubi i fundit që kontaktoi me ish-trajnerin e Shqipërisë, sezonin e shkuar, por De Biazi refuzoi këtë detyrë, pasi nuk mund të merrte një skuadër që luftonte mbijetesën dhe duhej një mrekulli për ta shpëtuar.
Tashmë, emri i tij ridel në skenë dhe këtë herë është një tjetër skuadër që lufton për mbijetesën dhe që e ka nisur mjaft keq kampionatin: bëhet fjalë për Frosinone.
Shkarkimi i Moreno Longo i ka hapur rrugë ish-trajnerit kuqezi, edhe pse ky i fundit me shumë mundësi do të refuzojë, pasi ashtu si me Crotone, nuk do të donte të rrezikonte në një skuadër që këtë sezon ka thuajse 1% të mundësive për t’ia dalë.
Hera e fundit që De Biasi ka drejtuar në Serinë A është përpara 8 vjetësh, në stolin e Udinese.
Kujtojmë që në dhjetor të 2011-ës, pas eksperiencës në Friuli, Gianni de Biasi u emërua trajner i Shqipërisë, ku qëndroi për thuajse 6 vite.
