Ministri i Turizmit dhe Mjedisit, Blendi Klosi paralajmëroi të gjitha subjektet që shfrytëzojnë hapësirën e bregdetit, se nuk do tolerohet mungesa e respektimit të ligjit për hapësirën publike të plazheve.
Në mbledhjen e Task Forcës në Pogradec, Klosi u shpreh se VKM-ja për stacionet e plazhit parashikon 20% të hapësirës së bregdetit brenda një njësie, duhet të jetë plazh publik. Sipas tij, kjo nuk është respektuar dhe tashmë institucionet përkatëse do të veprojnë.
“Është rritur numri i turistëve, është rritur turizmi, por na duhet të ecim paralelisht me standardet. Vendimi i Këshillit të Ministrave për këtë është i prerë. Moszbatimi i tij penalizon drejtpërsëdrejti ata që ushtrojnë këtë aktivitet në mënyrë të paligjshme, organet vendore që duhet ta kontrollojnë dhe natyrisht edhe të gjithë ne organet shtetërore që duhet të bëjmë monitorimin”, deklaroi ministri Klosi.
Më tej, Klosi përmendi edhe faktin se mungojnë kullat dhe rojat për ruajtjen e njerëzve në plazhe, ku nga 50 subjekte të monitoruara, vetëm 14 i zbatojnë të gjitha kriteret e VKM për stacionet e plazheve.
“Nuk mund të kemi rritje cilësore të turizmit, nëse nuk kemi rritje të shpejtë të shërbimeve dhe standardeve. Zbatimi i 3 elementë kyç: ndarja e plazhit publik, siguria e jetës, dhe higjiena do të sigurojnë standardet e duhura”, tha Klosi.
Ministri Klosi tërhoqi vëmendjen e tur operatorëve edhe sa i përket mjedisit duke kërkuar një trajtimin e ujërave të zeza, pajisjen me leje mjedisore dhe zbatimin e tyre.
Ministri i Shtetit për Sipërmarrjen, Eduard Shalsi, deklaroi se Pogradeci i ka të gjitha potencialet për tu zhvilluar si qytet turistik gjithë vjetor, por duhen zbatuar rregullat dhe standardet. Prefekti i Qarku Korçë, deklaroi se drejtoritë respektive në bashkitë, nuk kanë kryer detyrën për kontratat e qerasë së stacioneve të plazhit.
