Trajneri i Liverpool, Jurgen Klopp mori një vendim të paparashikueshëm kur vendosi që të mos marrë në Beograd, Xherdan Shaqirin. Ky vendim vjen si pasojë e problemeve politike të Serbisë me shqiptarët, pasi Shaqiri është me origjinë nga Kosova. Situata është tensionuar më shumë për faktin se gjilanasi në përballjen e Kupës së Botës me Serbinë shënoi për Zvicrën dhe festoi duke bërë shqiponjën me duar.
Por ky vendim, nuk i ka pëlqyer aspak zviceranëve të cilët natyrisht do të donin që të shihnin futbollistin e tyre në Champions. Mediat e ndryshme zvicerane, shkruajnë se me këtë vendim, u tregua përulësi kundrejt serbëve dhe se probleme politike janë në përmasa të mëdha, sidomos me lënien jashtë të Shaqirit.
“Shaqiri u la jashtë nga një gjest, por që nuk ka aspak lidhje me një deklaratë politike. Ai u la jashtë që të mos përzihet politika me sportin. Liverpooli po lejon politikën të ndërhyjë në sport dhe kjo është edhe më tragjike.
Fituesi është caktuar përpara fillimit: Janë nacionalistët serbë. Edhe nëse yjet e tyre të kuq nuk shkëlqejnë sonte dhe pësojnë humbje, nacionalistët mund të krenohen. Më e pakta, është që ata arritën të ndryshojnë formacionin e Liverpoolit edhe pa qenë aktivë. Edhe, ta mendosh se takimi Crvena Zvezda-Liverpool nuk ka prodhuar tituj të mëdhenj në media, deri në momentin që ndërhyri Klopp dhe njoftoi se nuk do të grumbullojë Shaqirin”, shkruan një nga gazetat zvicerane.
