Një zyrtar i lartë i shëndetësisë në SHBA ka paralajmëruar se për amerikanët kjo do të jetë një javë vendimtare, pasi priten shumë viktima nga koronavirusi.
Një ditë më parë, zyrtarë të lartë të shëndetësisë paralajmëruan amerikanët se do të përballen me një numër tronditës vdekjesh.
“Kjo do të jetë java më e vështirë dhe më e trishtuar e jetës për shumë amerikanë. Do të jetë Pearl Harbour, 11 shtatori i kohës sonë, veçse nuk do të jetë i lokalizuar në një vend. Do të ndodhë në gjithë vendin”. Kështu u shpreh zyrtari më i lartë i shëndetësisë, Jerome Adams, në një intervistë për televizionin “Fox News”.
Një lajm mjaft të trishtë ka dhënë Dr. Anthony Fauci, drejtor i Institutit Kombëtar për Alergjitë dhe Sëmundjet Infektive. Ai ka thënë në emisionin “Face the Nation” të televizionit CBS se kjo do të jetë një javë e keqe.
“Kjo do të jetë një javë e keqe. Do të jetë shokuese për disa”, u shpreh ai. “Nuk mund të them që e kemi situatën nën kontroll. Kemi vështirësi ta vëmë nën kontroll”, tha Fauci.
Megjithë rritjen e pritshme të numrit të viktimave në ditët në vazhdim, dr. Fauci tha se shpreson që pas 8-9 ditësh të shihet një ndalje dhe më pas rënie e rasteve. “Po përpiqemi ta vëmë situatën shumë më tepër nën kontroll. Është e qartë se jemi më mirë nga sa ishim”, tha ai.
Numri i të infektuarëve në SHBA po dyfishohet çdo pesë ditë. Ende nuk ka një kurë, vaksinë kundër koronavirusit. Mungesa e pajisjeve mjekësore ka bërë që vendi të mos përballojë rastet që sa vijnë dhe shtohen. Po kështu, njësitë e kujdesit intensiv janë në prag kolapsi. Testet janë të pamjaftueshëm për një vend si SHBA. Nga ana tjetër, një vaksinë e suksesshme mund të dojë 12-18 muaj që të prodhohet.
