Udhëheqësi i Koresë së Veriut, Kim Jong Un deklaroi se vendi po përballet me një krizë ushqimore, për shkak të përmbytjeve, situatës së pandemisë dhe sanksioneve të vazhdueshme.
Duke folur në mbledhjen e Partisë së Punëtorëve, lideri i vendit komunist u bëri thirrje autoriteteve për të zgjidhur mungesat e ushqimit që rezultojnë nga prodhimi i ulët bujqësor, që ai i atribuohet kryesisht dështimeve të të korrave, shkaktuar nga uraganet vitin e kaluar, shkruan The Wall Street Journal.
“Situata e ushqimit është e tensionuar tani sepse sektori bujqësor nuk ka qenë në gjendje të përmbushë objektivat e tij të prodhimit të drithërave për shkak të dëmit të shkaktuar nga uraganet vitin e kaluar,” tha Kim gjatë fjalës së tij.
Koreja e Veriut mund të përballet me mungesë të ushqimit deri në 1.35 milion tonë, sipas një raporti të majit nga Korea Development Institute, një institucion i mbështetur nga qeveria e Koresë së Jugut.
Raporti i institutit vlerësoi se kërkesat e vendit për ushqim janë rreth 5.75 milion tonë në vit.
