Arsil dhe Saimir Shera janë të dyshuarit kryesor për vrasjen e taksistit 71-vjeçar, Abdulla Budlla. Policia thotë se arrestuan 32-vjeçarin Sajmir Shera, i dënuar më parë dhe Arsil Shera, 20 vjeç.
Arrestimi i tyre u krye gjatë operacionit të koduar “Brothers”. Gjatë këtij aksioni u gjet dhe u sekuestrua edhe mjeti që kanë përdorur dy vëllezërit për të kryer krimin.
71-vjeçari Abdulla Budlla u vra më 3 gusht në Fushë-Prezë, në kryqëzimin me rrugën e Rinasit. Ai po qëndronte në vendin e zakonshëm pranë taksisë, kur një automjet në lëvizje qëlloi në drejtim të tij me breshëri kallashnikovi.
Autoritetet dyshojnë se i moshuari është vrarë për motive të dobëta. Banorët e zonës kanë treguar se 71-vjeçari nuk njihej si person problematik, dhe e përshkruajnë si njeri punëtor e të qetë. Ai ushtronte profesionin e taksistit në të zezë dhe lëvizte kryesisht në fshatrat përreth.
