Ministri i Jashtëm italian Luigi Di Maio ka bërë së fundmi disa thirrje të forta ndaj vendeve që kanë vendosur të mos hapin kufijtë me Italinë.
“Në këto ditë kam dëgjuar shumë për Italinë. Nuk më duket se është momenti për të bërë polemika, por një gjë dua ta them në mënyrë të qartë: Kërkojmë respekt.
Nëse dikush mendon të na trajtojë si lazzaretto (spital për sëmundjet infektive) duhet ta dijë se ne nuk do të qëndrojmë duarkryq. Unë e kuptoj konkurrencën midis shteteve, por me kushtin që ajo të jetë e shëndetshme dhe e drejtë.
Unë do t’u shpjegoj kolegëve të mi se Italia është e gatshme të presë turistë të huaj nga 15 Qershori dhe se ne do të veprojmë me transparencën maksimale. Situata e brendshme, të gjitha të dhënat për infeksionet, do të jenë gjithmonë publike.
Ne nuk e pranojmë listën e zezë dhe nuk kemi asgjë për të fshehur, përkundrazi. Ne gjithmonë kemi vepruar me përgjegjësi dhe transparencë dhe do të vazhdojmë ta bëjmë këtë”, u shpreh ai.
