Partia Demokratike i ka bërë thirrje të hënën Presidentit të Republikës, Ilir Meta, të vendosë veton ndaj ligjit që i hap rrugë shembjes së Teatrit Kombëtar dhe ndërtimit të një të riu.
“Në kushtet e asgjësimit të Gjykatës Kushtetuese nga mafia që na qeveris, ne po presim verdiktin e Presidentit të Republikës. Ne po presim që kreu i shtetit të vendosë veton e tij mbi ligjin mafioz Rama – Fusha dhe të mos bëhet pjesë e grabitjes e së paku 200 milionë eurove”, tha në një dalje për mediat deputeti i PD-së, Enkelejd Alibeaj.
Ai kishte edhe një thirrje për faktorin ndërkombëtar.
“Përfitoj nga rasti, t’i bëj thirrje faktorit ndërkombëtar në Tiranë, që ka, gjithashtu, përgjegjësi pse vendi është pa Gjykatë Kushtetuese, të mos heshtë! Të mos heshtë, njësoj si për drogën! Të mos heshtë njësoj si për bllokimin e Gjykatës Kushtetuese, por të reagojë për të ndaluar grabitjen e pasurisë publike dhe private nga kryeministri barbar dhe i korruptuar që drejton sot Shqipërinë.”
Partia Demokratike pretendon se me këtë ligj po i hapet rrugë grabitjes së rreth 8 500 metra katrorë pronë publike dhe kërcënimit të pronarëve privatë për ta shitur tokën me çmimin qesharak të përcaktuar, sërish në mënyrë antikushtetuese, nga kryemafiozi i qeverisë.
Alibeaj tha se nëse Gjykata Kushtetuese do të ishte sot në funksion dhe nuk do të mbahej peng nga Edi Rama, i cili ka bllokuar prej më shumë se 1 viti emërimet e reja, opozita, artistët, pronarët, qytetarët që kundërshtojnë grabitjen, do të kishin mundësi ta ankimonin ligjin në Kushtetuese dhe Gjykata të pezullonte çdo veprim të qeverisë.
