Është përcjellë mesditën e sotme për në banesën e saj të fundit, 16-vjeçarja Adela Çaçi, e cila 2-ditë më parë helmoi veten me fostoksinë, pasi nuk duroi dot shantazhet që prej javësh i vinin me sms në telefonin e saj nga një 17-vjeçar, i cili e kërcënonte për publikimin e një video-je.
Çaci ishte nxënëse në shkollën e mesme profesionale të qytetit të Beratit, në vitin e parë. Ndërsa, personi që e kërcënonte, David Kovaçi, tashmë i arrestuar nga policia ishte nxënës në të njëjtën shkollë me vajzën.
Familjarët e Adelës nuk ishin në dijeni për rastin dhe gjendjen psikologjike në të cilën ndodhej vajza e tyre.
Komshinjtë dhe të afërmit e Adelës pohojnë se familja e saj ishte mjaft punëtore dhe se të dy prindërit punonin çdo ditë në arë për të shkolluar Adelën dhe 2 motrat e saj. Ata shprehen se,16-vjeçarja ishte një vajzë e edukuar dhe e urtë dhe se lajmi i ka tronditur të gjithë.
Ndërkaq, drejtori i shkollës, Ferik Koçi shprehet se ajo ishte një nxënëse e dalluar, e urtë dhe asnjëherë nuk kishte sjellë shqetësime në klasën e saj dhe në shkollë, teksa shton se nuk kishte shfaqur asnjë shenjë depresioni dhe shqetësimi tek mësuesit a psikologët e shkollës.
