Presidenti Ilir Meta ka reaguar pas kërcënimit të bërë ndaj gazetarit Ylli Rakipi. Meta dënon presionin dhe kërcënimin e bërë ndaj Rakipit, madje këtë të fundit e ka thirrur në zyrë ku është njohur me shqetësimet dhe kërcënimet ndaj gazetarit.
Në një deklaratë shpërndarë mediave, Meta u bën apel institucioneve ligjzbatuese të hetojnë me përgjegjësi maksimale këtë rast me qëllim ndëshkimin e merituar të autorëve, si dhe fton gazetarët të denoncojnë çdo presion e shantazh.
Deklarata e plotë:
Presidenti Meta dënon kërcënimet ndaj gazetarit, Ylli Rakipi
Presidenti i Republikës, Sh.T.Z Ilir Meta pasi u njoh nga mediat me kërcënimet e bëra ndaj gazetarit të njohur, zotit Ylli Rakipi, priti në një takim të veçantë z.Rakipi dhe u njoh me shqetësimet dhe kërcënimet ndaj tij për shkak të detyrës.
Presidenti Meta shprehu solidaritetin e tij me z.Rakipi dhe të gjithë gazetarët që me guxim e profesionalizëm i shërbejnë interesit publik përmes fakteve dhe të vërtetave.
Presidenti Meta apelon ndaj institucioneve ligjzbatuese të hetojnë me përgjegjësi maksimale këtë rast me qëllim ndëshkimin e merituar të autorëve.
Presidenti Meta i bën thirrje të gjithë gazetarëve të denoncojnë çdo presion e shantazh që u bëhet në cënim të misionit të tyre i cili është vendimtar për demokracinë e sundimin e ligjit.
