Ngjarja e djeshme ku një gazetar u kërcënua me pistoletë në kokë, mori vëmendjen e duhur dhe nga instancat e larta, e ndërsa klasa politike ishte e mbërthyer me tensionet e asaj se çfarë do të ndodhte në Shkodër.
Jehona e lajmit të përcillte ndjesinë e keqe që la edhe gazetarja Klodiana Lala. Kërcënimi i gazetarit në krye të detyrës shtoi edhe më shumë frikën në radhët e gazetarëve, dhe jo vetëm.
Pas apelit të gazetarit Julian Shota, pronari i lokalit, Llesh Buraku, u shoqërua për në komisariat, për procedurat e mëtejshme. Vetë gazetari ka rrëfyer momentin kur u kërcënua me jetë nga Llesh Buraku, 53-vjeç, nga Laçi.
Pronari i lokalit të cilit i ishte vendosur tritol, tentoi të mbante të fshehtë ngjarjen, duke iu kërkuar përfaqësuesve të medias të mos e pasqyronin atë, pasi një gjë të tillë, sipas tij, do ta bënte edhe policia. Por ndryshe nga çfarë kishte raportuar vetë gazetari, policia hedh poshtë të gjithë ngjarjen, duke ngritur një skemë të re.
“Në lidhje me një lajm të publikuar në median elektronike ku shtetasi J.Sh. me profesion gazetar, është kanosur gjatë kryerjes së detyrës, si dhe i ka dërguar mesazh shefit të Komisariatit të Policisë Kurbin ku i ka kërkuar ndihmë dhe ky i fundit nuk i është përgjigjur, ju sqarojmë se :
Nga specialistët e Seksionit për parandalimin dhe hetimin e ngjarjeve kriminale në Komisariatin e Policisë Kurbin, u referuan materialet në Prokurorinë e Rrethit Gjyqësor Kurbin, në ngarkim të shtetasit Ll.B. 53 vjeç, banues në Kurbin, për veprën penale “Kanosje për shkak të detyrës” parashikuar nga neni 283 i Kodit Penal, pasi më datë 03.09.2018, rreth orës 15:00, është paraqitur pranë Komisariatit të Policisë Kurbin shtetasi J.Sh. i cili ka kallëzuar se rreth orës 07:00, ka shkuar për të pasqyruar ngjarjen e ndodhur në lokalin ku i është vendosur lëndë eksplozive, dhe është kërcënuar me armë zjarri nga pronari i lokalit, për moslejimin e filmimit të vendngjarjes.
Me marrjen e informacionit nga njoftimi i shtetasit J.Sh. tek Policia e Lezhës rreth orës 09:00, është ngritur grupi hetimor nën drejtimin e Drejtuesit të Prokurorisë së Rrethit Gjyqësor Kurbin, për sqarimin e plotë të rrethanave të ngjarjes, duke kryer të gjitha veprimet hetimore konform rregullave.
Nga kontrollet e ushtruara në ambientet në pronësi të shtetasit Ll.B., nuk është konstatuar asnjë armë zjarri apo send tjetër i kundraligjshëm.
Gjithashtu, në lidhje me sms-në e publikuar të dërguar nga shefi i Komisariatit të Policisë Kurbin shtetasit J.Sh., sqarojmë se nuk ka lidhje me ngjarjen, pasi mesazhi që shtetasi J.Sh. pretendon se i ka dërguar shefit të Komisariatit Kurbin ku i shpjegon ngjarjen dhe i kërkon ndihmë, nga verifikimet hetimore ka rezultuar se nuk i është dërguar fare shefit të Komisariatit Kurbin, duke mos u vënë në dijeni ai se çfarë po ndodhte.
Policia e Kurbinit, është e gatshme në çdo kohë të trajtojë me seriozitet dhe transparencë të plotë çdo situatë të çdo shtetasi”.
https://tiranatoday.com/e-kercenoi-me-jete-policise-i-del-gjumi-e-shoqeron-ne-komisariat-pronarin-e-lokalit/
