Këshilli i Emërimeve në Drejtësi (KED) ka dërguar në Kuvend listën me kandidatët për Inspektor të Lartë të Drejtësisë (ILD).
I pari në garën për drejtimin e këtij institucioni është renditur Artur Metani.
Ndërsa kandidatët e tjerë në listë janë: Joana Asimi Sorraj, Lindita Troja, Sokol Stojani dhe Eris Hysi. Nëse Kuvendi nuk arrin të zgjedhë kreun e ri mes këtyre 5 kandidatëve, atëherë zgjidhet automatikisht i pari në listë, Artur Metani.
ILD është institucioni që pritet të hetojë veprimtarinë e gjyqtarëve dhe prokurorëve.
Njoftimi i plotë:
Këshilli i Emërimeve në Drejtësi (KED), në datën 26.12.2019, në zbatim të pikës 4 të nenit 147/d dhe pikës 1 të nenit 149/d të Kushtetutës, të pikës 2 të nenit 199, shkronjës “ë” të pikës 2 të nenit 201, nenit 217, të pikës 5 të nenit 229 dhe nenit 239 të ligjit nr. 115/2016 “Për organet e qeverisjes së sistemit të drejtësisë”, i ka përcjellë Kuvendit të Republikës së Shqipërisë për të ushtruar kompetencën e zgjedhjes së Inspektorit të Lartë të Drejtësisë brenda 30 ditëve nga dorëzimi i akteve:
– Listën Përfundimtare të Renditjes së Kandidatëve të Lejuar për Inspektor i Lartë i Drejtësisë,
– Raportin e Arsyetuar për Renditjen e Kandidatëve të Lejuar për Inspektor i Lartë i Drejtësisë,
– si edhe aktet përkatëse të Këshillit të Emërimeve në Drejtësi gjatë procedurës së verifikimit, vlerësimit, pikëzimit dhe renditjes së kandidatëve të lejuar për vendin vakant të Inspektorit të Lartë të Drejtësisë.
Lista përfundimtare e renditjes:
- Artur Metani 89.6 Pikë
- Sokol Stojani 89 Pikë
- Joana Asimi Sorraj 82.2 Pikë
- Eris Hysi 78.3 Pikë
- Lindita Troja 63.4 Pikë
