Komisioni Evropian i ka kthyer përgjigje opozitës shqiptare për çështjen e Teatrit Kombëtar, duke theksuar se ka marrë dokumentacionin dhe po shqyrton rastin.
Në letër thuhet se “Komisioni u ka kërkuar autoriteteve shqiptare të paraqesin informacion shtesë për sa i përket këtij ligji special në mënyrë që të vlerësohet pajtueshmëria e tij me Marrëveshjen e Stabilizim Asociimit (MSA) mes Bashkimit Evropian dhe Shqipërisë si dhe gjithashtu me rregullat e Bashkimit Evropian në fushën e ligjit për konkurrencën dhe prokurimet publike”.
“Pas dorëzimit të dokumentacionit të kërkuar , Komisioni do mund të procedojë me rishikimin e nevojshëm si dhe respektivisht do të angazhohet me autoritetet shqiptare për këtë çështje“, thuhet gjithashtu.
Përgjigja është kthyer nga Genoveva Ruiz Calavera, e ngarkuar për këtë çështje nga Komisioneri Johannes Hahn.
Letra ka ardhur si përgjigje për: z Genc Pollo, Kryetar i Komisionit të Integrimit.
