Dy ditë më parë, moderatorja Jonida Shehu bisedoi me të ftuarit në emisionin e saj “Soiree”, rreth traditave dhe zakoneve të familjeve tironse. Në një moment ajo ka pyetur të ftuarit e saj për përdorimin e termit “katnar” nga kryeqytetasit, se kur e përdorin dhe përse. Kaq ka mjaftuar që kjo shprehje të kthehej në “mollë sherri”, e të komentohej gjerësisht në rrjetet sociale.
Reagimi i parë publik u dha nga Desada Metaj, e cila kishte lënë një shënim në Facebook. “Kujt i thoni ‘katnar’ ju tironsit?-pyet drejtuesja e emisionit kushtuar Tironës.
Unë: Ty mi katnare dhe ca të tjerëve si ti që jeni plot me komplekse dhe nuk dilni dot nga lëkura e provincës, dhe të përshtateni me qytetërimin…që nuk është vetëm tirons në Shqipëri.
Se mos harroj…edhe protestat n’Tironë ndizen gjithmonë”- shkruan Metaj.
Por duket se kjo situatë nuk është lënë me kaq, pasi janë ndezur gjakrat. Në një reagim për Blitz.al, Shehu është kundërpërgjigjur duke thënë se personat që shprehen në një mënyrë të tillë, tregojnë më shumë rreth vetes së tyre. Me një përgjigje shpërfillëse, Jonida bën me dije se Desada është e lirë të mendojë e të shprehet si të dojë.
“Mendimi që kemi për të tjerët, tregon më shumë për ne sesa për të tjerët realisht. Domethënë edhe ajo që Desada mendon për mua apo për dikë tjetër, ka vlerë dhe tregon më shumë për Desadën sesa për çdo gjë tjetër. Të gjitha Desadat e botës janë të lira të mendojnë e të shprehen si të duan…Nuk replikohet me shikuesit e programit. Nuk më pëlqen të replikoj me këdo që na ndjek në tv. Eshtë etikë profesionale, aq më tepër kur është edhe shikuese edhe kolege”, ka thënë Jonida Shehu.
