Situata në Durrës vijon të jetë kaotike në lidhje me mbetjet urbane që kanë ”pushtuar” thuajse të gjithë qytetin bregdetar. Por, një zgjidhje nga kompania ”Integrated Energy”.
Kompania e cila operon në Sharrë, i ka dërguar një letër bashkisë Durrës, duke i ofruar një zgjidhje për menaxhimin e mbetjeve urbane. Në shkresë, thuhet se Bashkia mund të depozitojë mbetjet në landfillin e Sharrës, pa asnjë pagesë.
Bashkia e Durrësit, do të ketë afat deri më 15 korrik për dërgimin e mbeturinave në këtë vendgrumbullim. Mësohet se pas kësaj date, duhet të gjendet një tjeët zgjidhje nga bashkia për këtë problem, teksa aktualisht, 6 kamionë janë nisur drejt Sharrës, për të transportuar mbetjet urbane.
Prej disa muajsh, Durrësi ndodhet në katastrofë mjedisore si pasojë e lënies së mëshirë të fatit të menaxhimit të mbetjeve urbane. Shkak janë bërë mosmarrëveshjet midis Bashkisë dhe Qeverisë.
Kazanët në disa vendgrumbullime janë mbushur dhe janë rreth 12 kamionë me rreth 10 ton mbeturina që nuk kanë se ku të zbrazen. Nga frika e sëmundjeve infektive, banorët në disa zona të Durrësit kanë nisur djegien e tyre.
