Kastriot Islami është i mendimit se kryeministri Rama, me mjaft mjeshtëri ka arritur që të mposhtë opozitën, duke i futur frikën. Në një analizë të përgjithme, të lëvizjeve taktike që bën Rama, Islami thotë se dita-ditës po bëhet edhe më i vogël numri i personave që hakmerren dhe të kenë një përballje të fortë.
Në këtë formë, kryeministri arrin që opozitës ti ikin përkrahësit e saj dita-ditës. I ftuar në “Fax News”, Islami shpjegon se tashmë kanë ngelur veç pak njerëz që vazhdojnë betejën me mazhorancën.
“Rama ka bërë dy gjëra, ka zhdukur alternativën brenda partisë së vetë dhe mundohet të sulmojë alternativën jashtë, ose e dobëson ose bën konsensus me të.
Rama ka vepruar duke dobësuar elementët e opozitës, sa herë që shikon një kundërshtar, ose e sulmon ose e kompromenton duke gjetur lidhjet me të, për ta frikësuar atë. Po ta shikojmë me vemendje, janë shumë pak njerëz nga opozita që vazhdojnë luftën me mazhorancën, po pakësohen nga dita në ditë.”
Islami riktheu ndër të tjera edhe personat me rekorde kriminale, të cilët tashmë janë bërë pjesë e jetës politike. Në vazhdën e akuzave, Islami shprehet se Rama ka vendosur çdo gjë në kontroll dhe është bërë njësh me krimin.
“Kujtojmë diçka, nëse në vitin 1990 kishe njerëz me formim në parlament, deputet të kualifikuar, me ardhjen e Ramës në 2015-ën, janë zëvendësuar me njerëz me formim të dyshimtë, me rekorde kriminale të cilët janë vendosur në pikat kyçe.
Një nga arsyet që unë ndihesha keq në parlament është se atje nuk të vlerësojnë, nëse ti flet për parime dhe një plan konkret për qeverisje, praktikisht ai parlament në sytë e publikut duket se si është. Rama ka vendosur çdo gjë në kontroll dhe është bërë njësh me krimin.
E vetmja gjë që e tremb tani Ramën janë vendet e Bashkimit Europian, si Merkeli e cila i dha një ‘shuplakë’, Franca e cila ishte skeptike në hapjen e negociatave.
Shuplakë e cila nisi me mosdhënien e statusit, hapjes së negociatave, ku edhe njeherë tjetër vendet e rëndësishme siç është Gjermania, Franca, nuk shkuan symbyllazi me raportet e përgatitura nga znj Mogerini, ku thonin se Shqipëria ka bërë reforma fantasike dhe Rama e përdorte si një kartë. Ai thoshte çfarë keni, ja institucioni më i rëndësishëm më ka vënë notën 10-të. Ndërkohë që doli Merkel, Macron që i thanë nuk është kështu siç thua ti, se nga të dhënat që kemi ne, e vërteta është ndryshe, i thanë se nuk mund të shkosh larg me punën që po bën. Nuk mund të shkosh larg me kompromentimin që po bën. Komisioni Europian i tha:”JO”, duke shtyrë hapjen e negociatave për vitin tjetër”, tha ai.
