Revista satirike «Charlie Hebdo» nuk e ka kursyer as katedralen Notre Dame, e cila u përfshi dje nga flakët. Në kopertinën e publikuar sot, revista satirike ka zgjedhur që të ironizojë pikërisht me foton e presidentit Macron.
Ky i fundit shfaqet me një buzëqeshje “djallëzore”, ndërsa në kokë mban dy kullat e katedrales në flakë. Në anën e majtë të karikaturës shkruhet “Reforma” dhe në të djathtë të saj, “Filloj me strukturën”.
“Ne do ta rindërtojmë katedralen të gjithë së bashku dhe ajo padyshim do të mbetet një nga destinacionet kryesore të Parisit”, tha Macron duke njoftuar se shumë shpejt do të hapë një skemë ndërkombëtare të mbledhjes së fondeve, për t’i rikthyer kryeqytetit Notre Dame-n e famshme.
Donacionet për rindërtimin e katedrales kanë kapur shifrën e 600 milion eurove, gjysma e të cilave është dhuruar vetëm nga dy persona.
