Polumbarët e Forcës Detare kanë gjetur trupin e pajetë të peshkatarit 60-vjeçar. Ministria e Mbrojtjes sqaron se trupi është gjetur 20 metra larg bregut.
Viktima u zhduk mbrëmjen e kaluar pranë vendit të quajtur “Raguna 1” në Karaburun, ku kishte hyrë në det për të gjuajtur peshk me pushkë sportive. Por, për shkak të motit të paqëndrueshëm, kërkimet i ndërprenë mbrëmjen e kaluar, ndërsa filluan sërish mëngjesin e sotëm.
“Roja Bregdetare e Forcës Detare, e mbështetur edhe nga Policia Kufitare për disa orë u angazhuan në operacionin e kërkimit nga deti dhe toka në Gjirin e Dukatit për peshkatarin e zhdukur dje. Shtetasi M.A., 60 vjeç, i veshur me kostumin e zhytjes u gjet në thellësinë 5 metra nga polumbarët e Forcës Detare”, thuhet në njoftimin e Ministrisë së Mbrojtjes.
