Trafiku i lëndëve narkotike të kryer nga shqiptarët është kthyer në një problem të madh për policitë e vendeve fqinje. Policia greke vijon aksionin në pikat kufitare, ndërsa ka kapur edhe 155 kg lëndë narkotike të llojit marijuanë.
Operacioni i policisë është zhvilluar në Kostur, ku u ndaluan dy mjete që vinin nga kufiri i gjelbër. Makina po drejtohej nga një 34-vjeçar shqiptar, ndërsa me të ishte edhe një shqiptar tjetër 30 vjeç.
Droga u gjet dhe u sekuestrua në mjetin e dytë, ku policia zbuloi 6 çanta që përmbanin 149 pako me 155 kg e 855 gramë marijuanë. Edhe mjeti i dytë drejtohej nga një shqiptar 25 vjeç.
Policia iu vuri prangat të tre shqiptarëve, ndërsa sipas policisë greke, dy të parët kishin detyrën të kontrollonin rrugën. Operacioni çoi gjithashtu në sekuestrimin e 2000 eurove, 4 celularëve e 7 kartave SIM.
Prej 20 janarit e deri sot, në Igumenicë, Janinë, Athinë, Selanik e kryesisht në zonën Kostur-Follorinë, policia greke ka sekuestruar 2.9 ton marijuanë që vinte nga Shqipëria, çka shënon një numër rekord rastesh që janë sekuestruar sasi të mëdha droge.
