Këshilli i Lartë i Prokurorisë ka intervistuar kandidatin e dytë për kreun e Prokurorisë së Posaçme kundër Korrupsionit dhe Krimit të Organizuar (SPAK). Kandidati i dytë Arben Kraja ka kërkuar besimin e KLP-së për të drejtuar SPAK-un, me argumentin kryesor eksperienca si drejtues. Sipas tij, ky do të jetë çelësi i suksesit të tij.
“Do të paraqes në mënyrë të përmbledhur vizionin tim për drejtimin e SPAK. Jam i ndërgjegjshëm për punën që na pret për ngritjen dhe efektivitetit e kësaj strukture. Vlerësoj KLP për mënyrën profesionale dhe transparente në përzgjedhjen e prokurorëve për SPAK dhe sot për garën për drejtuesin e saj. Kam eksperience drejtimi e cila garanton suksesin tim në drejtim të institucionit. Drejtuesi do të ketë eksperienca manaxheriale, njohuri administrative, financiare. Kam bashkëpunuar me organizatat ndërkombëtare për draftin për sekuestrot parandaluese, imuniteti i zyrtarëve të lartë. Në cilësinë e drejtuesit do të mbroj prokurorët nga sulmet e padrejta. Drejtuesi duhet të ketë sjellje të ekuilibruar”, tha Kraja.
