Kampioni shqiptarë i peshave të rënda në Suedi në Artet Marciale Mikse, Ilir Latifi zbarkoi në Shqipëri për një turne promovues të kësaj disipline. Latifi ka lindur në Malmo të Suedisë, por është me origjinë nga Kosova dhe fama e tij tashmë është botërore duke u renditur në luftëtarët më të fortë të UFC-së.
“E ndjej veten shumë mirë që kam ardhur në Shqipëri të takoj fansat dhe popullin tim”, shprehet Latifi. Që prej muajit shkurt të këtij viti Ilir Larifi mban vendin e 5 në renditjen e peshave gjysmë të rënda në divizionin UFC. Ngjitja e tij drejt suksesit nuk ka qenë e lehtë.
“Ka qenë një rrugë shumë e vështirë, tani jemi në nivele të larta, por do të punoj edhe më shumë për ta marrë titullin më të rëndësishëm”, thotë Latifi. Si pjesë e aktiviteteve dhe promovimit të sportit me mbështetjen e bashkisë Tiranë, Latifi do të jetë për pak orë në Sheshin “Nënë Tereza” në kryeqytet. Luftëtari i vetëm shqiptar në UFC, numëron 20 ndeshje si profesionist, nga të cilat 14 i ka fituar bindshëm.
