Gjykata Kushtetuese ka hedhur poshtë kërkesën e shoqatës së tregtarëve për rrëzimin e ndryshimeve në ligjin për sigurinë publike, të cilat detyrojnë bizneset të instalojnë kamera të cilësisë së lartë.
Shoqata e Tregtarëve kishte kërkuar shfuqizimin si antikushtetues të ligjit nr.19/2016 “për masat shtesë të sigurisë publike”.
Vendimi i Kushtetueses ka qenë unanim, duke rrëzuar kërkesën e depozituar nga përfaqësues të biznesit, të cilët e quajtën antikushtetues detyrimin për të vendosur kamera sigurie me pamje video me cilësi të lartë dhe për t’i vendosur në dispozicion të drejtësisë në çdo rast pamjet.
Lënia në fuqi e këtij ligji, detyron bizneset që rezultojnë me të ardhura mbi 10 milion lekë në vit, të vendosin kamera sigurie të cilësisë së lartë për të monitoruar ambientet e tyre.
Po ashtu, kamera sigurie do të kenë dhe taksitë, autobusët, lokalet që mbartin më shumë se 50 klientë, institucionet publike, si kopshtet, apo shkollat.
Çdo biznes i parashikuar në ligj është i detyruar në instalimin e këtyre kamerave. Në të kundërt, ligji parashikon gjoba të cilat variojnë nga 5 mijë deri në 100 mijë lekë.
