Pas betimit të Arta Vorpsit si anëtare e Gjykatës Kushtetuese, ka ardhur reagimi i noteres Miranda Xhemalçe.
Në një deklaratë për mediat, Xhemalçe theksoi se ka bërë vetëm detyrën, njësoj si me të gjithë qytetarët e tjerë. Sepse detyra e saj ligjore është që të legalizojë nënshkrimet në dokumente, sipas ligjit dhe kërkesë së qytetarëve.
“Kam bërë vetëm detyrën time. Legalizova nënshkrimin e Arta Vorpsit. Detyra ime, të legalizoj nënshkrimet në dokumente.
Kam zbatuar vetëm ligjin. Respektova ligjin për noterinë. Neni 65 germa ë me dha te drejtën te certifikoj çdo deklaratë që nënshkruhet në praninë time. Znj.Vorpsi u paraqit me një kartë identiteti dhe ne prani time nënshkroi një deklaratë qe e kishte hartuar jashtë zyrës sime”, deklaroi noterja.
Noterja në fjalë ka “betuar” ditën e sotme Arta Vorpsin, duke sfiduar në këtë mënyrë autoritetin e kreut të shtetit, Ilir Meta. Kopjen e betimit, Vorpsi ia ka dërguar Metës, KED dhe Gjykatës Kushtetuese me Postë.
Mirëpo, ky akt bie ndesh me nenin 8 të Kushtetutës, ku parashtrohet qartë se anëtari i Gjykatës fillon detyrën pasi betohet tek presidenti.
