Remal Rada, ish efektivi i RENEA-s i cili u arrestua së bashku me Elton Hithin dy ditë më parë në Tiranë, janë lënë në burg. Gjykata e Tiranës u ka caktuar sot masën “arrest me burg” për dy armëmbajtësit pa leje, të cilat iu gjetën në automjetin e tyre luksoz si dhe në dy banesa të Remal Radës.
Dyshimet e Prokurorisë janë për Remal Radën, i cili mendohet të jetë pjesë e një grupi kriminal vrasësish me pagesë. Kjo falë arsenalit të armëve të cilat Rada i kishte shpërndarë në makinë, dhe në dy banesa por edhe për faktin se edhe pse nuk ishte më në detyrë si efektiv i RENEA-s, ai mbante pa të drejtë uniformën e policisë.
Hithi ka kërkuar masë me afat, duke pretenduar se e ka telefonuar një person i panjohur në emër të një të njohuri të tij në Angli, dhe i ka thënë “kam një pako për ty. Hajde merre në Sauk, por është pak me rrezik”, shkruan BalkanWeb. Hithi pretendon se ka shkuar për korrektësi me shokun në Angli dhe e ka filmuar me telefon takimin. Pasi ka shkuar me Radën, e ka marrë pakon dhe e ka vënë në makinë. Pak metra më poshtë i ka ndalur policia. Hithi pretendon se i ka në telefon edhe videon edhe kontaktet e personit që e ka telefonuar. Një ditë më parë dy të arrestuarit kanë refuzuar të japin mostër ADN-je.
