Kryebashkiaku i Kamzës, Rakip Suli ka mbërritur në SPAK, ku do të japë sqarime për kallëzimin ndaj paraardhësit e tij Xhelal Mziu.
Kreu aktual i Bashkisë së Kamzës, pretendon se Mziu ka shpërdoruar detyrën në cilësinë e drejtuesit, dhe nuk i ka marrë subjekteve që kanë marrë leje ndërtimi, 3% të sipërfaqes për banesa sociale, siç e parashikon ligji.
Suli është thirrur në SPAK për të dhënë më shumë sqarime ndaj kallëzimit për Mziun, për abuzim me tenderat në kohën që mbante postin e kryetarit të Bashkisë së Kamzës.
Rreth 2 muaj më parë, ka qenë Xhelal Mziu që u paraqit në SPAK për këtë kallëzim.
Hetimet po ndiqen nga prokurori Klodian Braho. Sipas dosjes hetimore, në lejet e ndërtimit dhënë nga Bashkia Kamëz, Xhelal Mziu në atë kohë kryetar Bashkie, nuk ka zbatuar 3% të pronësisë për strehim social nga kompanitë e ndërtimit, të cilat sipas marrëveshjes e japin ose banesë të përfunduar ose paguajnë vlerën monetare.
