19 Mars 2003 – SHBA dhe aleatët nisin luftën kundër Irakut
Shtetet e Bashkuara, së bashku me forcat e koalicionit të përbëra kryesisht nga Mbretëria e Bashkuar, nisin luftën ndaj Irakut. Pak minuta pasi nisën bombardimet ajrore mbi Bagdad, kryeqyteti i Irakut, presidenti Xhorxh Bush deklaroi në një fjalim televiziv:Në këtë moment, forcat amerikane dhe koalicioni, janë në fazat e hershme të operacioneve ushtarake për të çarmatosur Irakun, për të çliruar popullin e tij, dhe mbrojtur botën nga një rrezik i madh.
Presidenti Bush dhe këshilltarët e tij e ndërtuan pjesën më të madhe të kauzës të tyre për luftën, mbi idenë se Iraku, nën diktatorin Sadam Husein, zotëronte ose ishte në proçesin e ndërtimit të armëve të shkatërrimit në masë.
Operacionet nisën rreth 90 minuta pasi skadoi afati i vendosur nga SHBA ndaj Sadam Huseinit, për t’u larguar nga Iraku ose përballur me luftën. Objektivat e para, për të cilat Bush tha se ishin të një “rëndësie ushtarake”, u goditën me raketa Tomahawk nga bombarduesit amerikanë, dhe anijet luftarake të vendosura në Gjirin Persik.
Në kundërpërgjigje ndaj sulmeve, radioja e Bagdadit njoftoi se “të ligjtë, armiqtë e Zotit, atdheut dhe njerëzimit, kanë ndërmarrë marrëzinë e agresionit kundër atdheut dhe popullit tonë”. Megjithëse Sadam Husseini kishte deklaruar në fillim të marsit 2003, se “s’ka dyshim që besimtarët do të fitojnë kundër agresionit”, ai u fsheh menjëherë pas pushtimit amerikan, duke folur me popullin e tij vetëm nëpërmjet ndonjë videokasete të rastit.
Forcat e koalicionit ishin në gjendje të rrëzonin regjimin e tij, dhe të pushtonin qytetet e mëdha irakiane në vetëm 3 javë, duke pësuar vetëm disa viktima. Presidenti Bush, shpalli fundin e operacioneve kryesore luftarake më 1 maj 2003. Pavarësisht nga mposhtja e forcave ushtarake konvencionale në Irak, pasoi një kryengritje guerile, e cila shkaktoi mijëra viktima në rradhët e trupave të koalicionit, atyre kryengritëse, si dhe civilëve.
Pas një përpjekjeje intensive, ushtarët amerikanë e gjetën Sadam Huseinin të fshehur në një vrimë të thellë nën tokë, 13 km larg vendlindjes së tij, Tikrit. Ai nuk bëri asgjë rezistencë. Një ushtar në vendngjarje e përshkroi atë si “një njeri që iu dorëzua fatit të vet”. Husein u arrestua, dhe ndaj tij filloi në tetorin e vitit 2005 një gjyq për krime kundër popullit të tij, përfshirë vrasjet masive.
Në qershorin e vitit 2004, qeveria e përkohshme që u ngrit pas rrëzimit të Sadamit, ia transferoi pushtetin qeverisë së ndërmjetme të Irakut. Në janarin e vitit 2005, populli irakian zgjodhi një Asamble Kombëtare prej 275 anëtarësh. Një kushtetutë e re për vendin, u ratifikua tetorin e atij viti.
Më 6 nëntor 2006, Sadam Husein u shpall fajtor për krime kundër njerëzimit dhe u dënua me vdekje me varje në litar. Pas një rekursi të pasuksesshëm, ai u ekzekutua më 30 dhjetor 2006. Ndërkohë ekspertët e OKB-së, nuk gjetën asnjë armë të shkatërrimit në masë në Irak.
19 Mars 1945 – Pak javë para kapitullimit gjerman, Hitleri urdhëron shkatërrimin e industrisë gjermane
Me humbjen e pritshme dhe ushtritë aleate që po i afroheshin Berlinit, udhëheqësi nazist Adolf Hitler, urdhëron shkatërrimin e industrisë se mbetur gjermane. Në fundin e vitit 1944, Ushtria e Kuqe i kishte detyruar gjermanët të tërhiqeshin në Evropën Qendrore, ndërsa aleatët Perëndimorë po përparonin drejt Gjermanisë.
Hitleri kuptoi se Gjermania e kishte humbur luftën, por nuk lejoi asnjë tërheqje. Ai shpresonte
të negocionte një paqe të veçantë me SHBA-në dhe Britaninë, një shpresë e nxitur nga vdekja e Frenklin D.Ruzvelt më 12 prill 1945. Kryeneçësia e Hitlerit, dhe kundërshtimi i realitetit në fushën e betejës, lejuan edhe vazhdimin e Holokaustit.
Ai urdhëroi shkatërrimin e plotë të të gjithë infrastrukturës industriale gjermane, para se ajo të binte në duart e aleatëve, duke thënë se dështimi i Gjermanisë për të fituar luftën, i kishte hequr të drejtën për të mbijetuar. Hitleri vendosi që i gjithë kombi të merrte fund bashkë me të. Ekzekutimi i këtij plani të tokës së djegur, iu besua ministrit të Armëve Albert Speer, i cili nuk iu bind urdhrit.
19 Mars 1628 – Anglezët themelojnë në Amerikanë koloninë e Masaçusetsit.
19 Mars 1644 – 200 anëtarë të familjes perandorake në Pekin, kryejnë vetëvrasje si shprehje të
besnikërisë ndaj perandorit.
19 Mars 1895 – Auguste dhe Louis Lumière, regjistrojnë pamjet e para nëpërmjet kinematografit të tyre të sapo- shpikur.
19 Mars 1920 – Senati i Shteteve të Bashkuara, kundërshton për herë të dytë ratifikimin e Traktatit të Versajës, që i dha fund Luftës së Parë Botërore.
19 Mars 1943 – Frenk Niti, bosi mafioz i Çikagos pas Al Kapones, kryen vetëvrasje në stacionin qendror hekurudhor të qytetit.
19 Mars 1962 – Përfundon lufta për pavarësinë e Algjerisë.
19 Mars 1965 – Portreti “Titus” i piktorit të famshëm holandez Rembrand, shitet 4 milionë 500 mijë dollarë, një shumë rekord për kohën. Titus ishte djali i vetëm i piktorit, mes 4 fëmijëve, i mbijetuar deri në moshë të rritur. Rembrandi e realizoi portretin në vitin 1660, kur Titus ishte 19 vjeç, dhe ai paraqitet i veshur si murg.
19 Mars 1982 – Lufta e Falklands:Forcat argjentinase vendosen në Ishullin e Xhorxhias Jugore , duke shkaktuar nisjen e luftës me Mbretërinë e Bashkuar.
19 Mars 2004 – Presidenti i Taivanit Chen Shui-bian qëllohet në një atentat një ditë para zgjedhjeve presidenciale.
19 Mars 2011 – Lufta Civile Libiane:Pas dështimit të forcave të Muamar Gadafit për të marrë Bengazin, Forcat Ajrore Franceze nisin Operacionin Harmatan , duke filluar ndërhyrjen ushtarake të huaj në Libi .
19 Mars 2016 – Një shpërthim i fuqishëm ndodh në Sheshin Taksim në Stamboll të Turqisë, duke vrarë 5 persona dhe duke plagosur 36 të tjerë.
